مواضيع ذات علاقة : أيه ... في إيه؟؟!
بعض الأمور كان لازم يتم توضيحها
أولا: الموضوع مش طويل لأنه تضمن بنود الموضوع الأساسية من فكرة عامة و بعض الامثلة و الرأي الشخصي و سبت كل واحد بعدها يعبر عن رأيه على مزاجه
ثانيا: زي ما قلت قصة الشعراوي أنا قرأتها بما معناه ان الحب حلال إذا كان غرض نهايته الزواج أما باقي الكلام و زي ما وضحت في الموضوع فهو حوار بيني و بين شخص آخر ليس له علاقة بالشيخ الشعراوي إطلاقاً
ثالثا: فكرة ان يكون ليك أخ و أخت غير أخواتك تحكيلهم و تفضفضلهم .. ماشي لو حسبناها بالعقل فرق الأعمار لن يكون أكتر من 4 سنين فا فارق الخبرة مش حيكون كبير..لكن حنفترض ان احنى لقينا شواذ للقاعدة و في ناس ممكن تفيدكماشي انا لم أعترض بس أنا حاولت ألاقيلك حلول في الموضوع توفر عليك الهم شوية
رابعا: و دي أهم نقطة عندي و هي اني مقلتش يا جماعة محدش يكلم بنات و كلام البنات حرام... لأ انا قلت في نهاية الموضوع انا معرفش و أرجو الاستشارة.. يعني سبت الموضوع مفتوح و مقلتش هوا ده رأيي.. لإني بجد محتار و محدش من الشيوخ عارف يدي كلام واضح.
يا جماعة .. يا جماعة ... أنا عرضت مشكله عامة و مقلتش دي مشكلتي يا ريت حد يساعدني في حلها
أنا كل اللي عملته حكيت موضوع اديت عليه امثله و اديته رأيي و سبت باقي الناس تقول رأيها
بس رأيها في الموضوع .. مش فيا أنا كشخص عندي مشكله
18 comments:
اولا: من ناحية حجم الموضوع فهو طويل فعلا
ثانيا:برضه ماعرفتش مصدر قصة الشعراوى ,واذا كان الحوار بينك وبين صاحبك فلماذا ذكر الشعراوى؟
ثالثا: اللى اكبر منك بيوم يعرف عنك بسنة (مش ده رأيك برضه)
رابعا:العملية مش كلام بنات واللا اولاد اهم حاجة توافر عنصر الاحترام و انك تعامل اللى قدامك على اساس انه اخ اواخت برضه وانت عمرك ما هاتغلط او حتى حد يفلطك
واخيرا ....واخيرا... المشكلة دى خاصة بكل واحد وانا واثق ان ناس كتير قرأت الموضوع لكن مش عارف ليه انت اخذته على محمل الشخصية
منشاوى*** احب ابشرك ان مهما حدث فانت اخويا (بجد)وده شئ اعتز بيه قدام الناس كلها
انا قلتلك يا منشاوى
فضفض فى البيت
طلع الموضوع ده من دماغك
بالعربى اتقل وما تصطادش فى الميه العكرة
زيًط بس بذكاء
ماتدلقش علشان ما حدش ياخد باله
انا زغلان منك
انا قلتلك ان احنا هنخليه ملف العدد ليه استعجلت واللا انت عاوز تعمل ضجة للمدونة بتاعتك وخلاص
يا منشاوى انا حبيت اوصل رسالة لكل الناس بما فيهم انت
وبما ان الموضوع بتاعى فأنا بأهديه لأعز اخواتى واصحابى ومعارفى وخاصة بأهديه ليك يامنشاوى
وما تفكرش فى يوم انك تاخد حاجة مش بتاعتك وخاصة لما تكون( لأبو المجد )وياريت تكون فاهمنى كويس جدا
Ahmed Abo Elmajd
لازم تفهم إني أنا طرحت مشكلتك كمثال في جزء من موضوع كبير..إنتا إتكلمت عن محور من موضوع أنا بتكلم فيه علشان كده حطيت قصتك كمثال و لم اتخذ اي سبيل او اعمل اي حاجة تسببلك الإهانة
و ثانيا أرجو قراءة الموضوع الأصلي و قراءة الرد مرة تانية حتفهم قصة الشعراوي
و برضو أنا وضحت الموضوع في الرد على كلامك و قلت أنا مش صاحب مشكله .. أنا اتكلمت على مشكله في عقول ناس كتيرة تانية مأتكلمتش على مشاكلها.. أنا بقى اتكلمت نيابة عنهم مش أكتر.
ممكن أكون ضمن الناس دي و ممكن لأ ، فا كون إن حد يطلعني أو يدخلني في المشكله أو يعاملني على أساس اني بتكلم عن نفسي الكلام ده مينفعش.
أنا بقلها تاني أنا بتكلم عن مشكله عامة مش مشكلتي أنا يعني مفيش محمل شخي
في الموضوع أبداً
و وضحت برضو إني لا أحتكر الردود .. إنتا رد و أنا أرد .. أنا قلت رأيي في فكرة الكلام و فارق الأعمار و إنتا قلت ده ينفع و وضحت السبب في ردك.. فا متاخدش كلامي هجوم أو اعتراض عليك نحن نتنااااقش مش أكتر.
و انا أعتز بيك كأخ و إنتا عارف كده
Ahmed Abo Elmajd
ردك التاني مفهمتوش و يحتاج توضيح.. و اسلوبك في الرد ناشف شوية يعني ححاول آخده بحسن نيه بس يتوضح يا ريت
زي ما قلت الموضوع انا استوحيته من كلامك .. إنتا اتكلمت عن محور و أنا اتكلمت عن موضوع فيه محورك مش أكتر .. لو كان كده يبقى أنا لا أعتقد إني أخدت حاجة مكتوب عليها أبو المجد
عاوز نوكيا..روح ل(راضـــــى)-
يا حج راضي انا موافق على كلامك و بقول كده برضو ولا أعتقد وجدود مية عكرة ولا صيد في الموضوع :)
و تاني يا ريت اللي يقرأ الموضوع ياخده على الناس كلها بنات و ولاد مش علية أنا و يا رب الناس تاخد بالها من كده و شكرا ...
عبد الراضي أنا مقدرش أزعلك أبدا و الموضوع زي ما هو انا لا عملت ضجة ولا حاجة و ما حرقتش ملف العدد لأنني كاتب الموضوع قبل ما تقلي إنه ملف العدد.. يبقى إنتا كده اللي حرقت ملف العدد ؛)
منشاوي
أي
كفاية كده
هو فيه يا جماعة؟؟
منشاوى..ملقتش كومنت اقوله
لانى بصراحة ملقتش حل
ومفتكرش انك هتوصل لحاجة
مش بكسر مجاديفك ولا حاجة
بس ده هو مجتمعنا.. وهبفضل كده ع طول
تحياتى
محمد محمود يوسف
منونا في المدونة لكن نفسي في مرة تدخل تدي رأي مش أي كلام و السلام
و منور :)
mero_wild_cat
مفي حاجة إتي عارفة إني أنا و أبو المجد بنحب الهزار مع بعض كتير
و انا عارف ان ناس كتيرة جدا حتدخل تقرأ الموضوع و مش حتعرف تقول رأي
بس إن شاء الله إن شاء الله حنوصل لحل مستحيل تكون ملهاش حل و زي ما قالو كل مشكله و ليها حلال
أولاً ،معلش ياكبير، الرد بتاعي كان المفروض يبقى في الموضوع الأساسي...مش عارف فط، نط، ضرب سقف حلق بوق وجه هنا إزاي
ثانياً، أول ماقريت البوست، تذكرتك والنهار مودعاً والقلب بين مش عارف أيه ورجاء
افتكرتك يوم ماكنا انا وأنت وراضي في الخيمة وقعدنا نطبَل غلى ترابيزات الأكل
فاكرها دي؟ء
طيب فاكر لما اتسحبنا جنب الندوةوسمعنا الشيخ اللي قال إن السلام باليد بين الجنسين لو مفهوش شهوة يبقى آمين؟ء
فاكر لما أنت وراضي معجبكومش الكلام وأنا كنت على العكس
أنا افتكرت ده ،وافتكرت رأيك اللي أنا شايفه متشدد
ثالثاً لما قريت موضوعك حسيت إنك عامل كهربة زيادة أوي
أبقى أكتبلك بعدين عن نفس الموضوع
محمد محمود يوسف
فاكر يا عم ايامكو الحلوة
و ثانيا بقى انا مش متشدد خالص في حديث عن الرسول صلى الله عليه و سلم قال فيما معناه ان يطعن احدكم بسيخ من حديد اهون من ان يمس امرأة لا تحل له.. يبقى ازاي بقى السلام حلال
طيب سؤال تاني.. حتسلم عليها بإيدك ليه متقلها سلامو عليكو من بعيد .. حتكسب ايه لو سلمت بإيدك
دبستك انا .. يعني السلام ملوش معنا خالص .. يعني بلاش حجج واهية
منور و سلامو عليكو.... من بعيد
منشاوى
فاكر أنت قولت ساعتها ايه بصوت عالى
فضختنا
طيب يامنشاوي....خلينا بقى نقلبها نقاش جاد جداً
أولاً كده اللي أوله شرط آخره نور
الشرط إنك تقرا الكلام الجاي كله وتفهمه من غير متزهأ مني
لأن يطعن في رأس أحدكم بمخيط من حديد خير له من أن يمس امرأة لا تحل له
ده نص الحديث اللي سعادتك تقصده
والحديث صحيح مقلناش حاجة
طيب أقولك بقى والعهدة على عقلي القاصر
الحديث بيقولك.."يمس"...طيب معنى يمس ده هوا اللمس العادي؟ ولا اللمس الشَهوي؟ لاحظ إني بكلمك على ناس وسطهم السلام بالأيد ده مش حاجة
تدخل بسيط في النص ملوش دعوة بالموضوع
تعرف إن بعض الناس في مصر بيتبادلوا التحية بين الجنسين بالتقبيل على اليد..وأحياناً الخد
!!!!!!!!!!!!!!!!!!!!
تعرفها
طيب ....نرجع لموضوعنا
تعرف بقى إن موضوع السلام باليد ده بالنسبة ليا وبالنسبة لعدد كبير من جامعتك مبيحركش في النفس أي حاجة؟...تعرف إني قبل ماأدخل جامعتك وبعد مادخلتها لسه بسلّم على جيراني البنات باليد
السلام بريء ياأخ منشاوي ومش بتلكك عليه
ليه نحط حاجة حساسة في حياتنا مكناش بنعملّها حساب
ليه بنحب نتقّل على نفسنا
سلامو عليكم من بعيد
طيب تعرف إن فيه زمايلي بنات بيبقى نفسي أخدهم بالحضن من كتر ماوحشوني
بس كده يبقى بظيط فعلاً
قال سلامو عليكم من بعيد
يبني الدنيا بسيطة والركّ أساساً على النية
خلي بالك من الكويت
وسلامو عليكم من قريب وبالحضن وبوستين على خدك كمان لو أقدر
ازيك يا منش وحشني يا ماااااااااااان......هو ايه ضرب النار اللي عالمدونة بتاعتك ده......انا حاسس اني ع الجبهة.......ربنا يعينك
منشي حبيب ألبي...ده أول تعليق ليا في المدونة الجامدة جدا بتاعتك دي..وأنا أسف جدا على إني اتأخرت عليك كل ده بس الظروف الي بمر بيها انت عارفها كويس...وبعدين ايه الحالة الصراخ اللي بينك وبين زمايلك دي مش معقول يامنش...الحكاية متساهلش كل ده..وبعدين نصيحة من أخوك اللي بيموت فيك أي نقاش عاوز توصل بي رأيك في خلاف مع زمايلك بلاش يبقى على النت لأن كل مشكلة بتتخل حيز الناس بتتثبت وبتسيب أثار في القلب حتى بعد اختفاءها..والنت في الأول والاخر مش هتعرف تقول فيها كل حاجة وجايز ناس تفهمك غلط وشغلانة تبقى طين!!!!!أما بالنسبة للموضوع اللي انت أثرته فالكلام في كتييييير وبعض الحلول ممكن تنفع مع حد ومتنفعش مع التاني ولكن لما أقابلك ونتكلم أكيد ممكن نوصل لقناعة أحسن
تحياتي
دنتا ناوي تخليها قعدة عرب يا عمووور
ماشي و انا معاك
في خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:
1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
ارجو من كل من يقراء هذا ان يزور ( مقالات ثقافة الهزيمة) فى هذا الرابط:
http://www.ouregypt.us/culture/main.html
Post a Comment